सन् २०५० भित्र ५ अर्ब जनसंख्या पानीको अभाव झेल्ने

काठमाडौ– पानीको संकटबाट सन् २०५० सम्म ५ अर्ब जनसंख्या प्रभावित हुने प्रक्षेपण सार्वजनिक भएको छ । पानीको अवस्था सम्वन्धी संयुक्त राष्ट्रसंघले हालै सार्वजनिक गरेको एक अध्ययनले यस्तो देखाएको हो ।

विशेषगरी जलवायु परिवर्तन, बढ्दो पानीको माग र प्रदूषित पानीका कारण ५ अर्ब जनसंख्याले पानीको अभाव भोग्नुपर्ने अध्ययनको निष्कर्ष छ ।
सो अध्ययनले नदी,इनार लगायतका पानीका अन्य स्रोतहरुमाथि वढ्दो अतिक्रमण रोक्नका लागि तत्काल कदमहरु नचालेमा त्यसले विकराल समस्या ल्याउने भनेको छ । यसले विभिन्न विवाद र मानव सभ्यता माथि नै असर गर्ने समेत अध्ययनले उल्लेख गरेको छ।

पृथ्वीको जनसंख्याले वर्षेनी ४६०० क्युविक किलोमिटर पानीको उपयोग गर्ने गर्दछन् । जसमध्ये ७० प्रतिशत कृषि, २० प्रतिशत उद्योग र १० प्रतिशत घरहरुमा उपयोग हुन्छ ।

विश्वमा गत १०० वर्षमा पानीको मात्रा ६ गुणाले बढेको छ भने प्रत्येक वर्ष १ प्रतिशतले वढीरहेको छ। सन् २०५० सम्म विश्वको जनसंख्या ९.५ अर्ब र १०.२ अर्बको विचमा रहने प्रक्षेपण गरिएको छ।
जसमा प्रत्येक ३ जनामध्ये २ जना शहरमा वस्ने छन् । विकसित भन्दा अल्पविकसित मुलुकहरुमा पानीको माग झनै वढ्ने पनि अध्ययनमा भनिएको छ ।

जलवायु परिवर्तनका कारण उत्पन्न हुने सुख्खापनका कारण पानीको माग झनै वढ्ने औल्याइएको छ। खडेरी र पहिरो यस अगाडी नै मुख्य समस्याको रुपमा देखा परिसकेका छन् । त्यसमध्ये पनि खडेरी जलवायु परिवर्तनका कारण उत्पन्न भएको एउटा ठूलो समस्या हो।

करिब १ करोड ३० लाख जनसंख्या रहेको इरानको तेहरानमा खानेपानी तथा सिँचाइ निम्ति भूमिगत पानीको व्यापक प्रयोग हुन्छ। जमिनमुनिबाट अत्यधिक पानी खिच्दा भूमिगत स्रोत रित्तिन गई भासिन थालेको वैज्ञानिकहरूले बताएका छन्।

Facebook Comments