विद्युतीय सवारी साधन प्रवद्र्धनका लागि प्राधिकरणको नयाँ नीति

काठमाडौँ– नेपाल विद्युत् प्राधिकरणले रातिको समयमा विद्युतीय सवारी साधनलाई चार्ज गर्न सस्तो दरमा विद्युत् उपलब्ध गराउने भएको छ ।

सरकारले विद्युतीय सवारी साधनको प्रयोगलाई विस्तार गर्ने र सार्वजनिक यातायातामा पेट्रोलियम पदार्थको खपत घटाउने लक्ष्य राखेकामा त्यसलाई पूरा गर्न रातिको समयमा सस्तो दरमा विद्युत् उपलब्ध गराउने नीति लिएको हो ।

प्राधिकरणका कार्यकारी निर्देशक कुलमान घिसिङले रातको समयमा प्रतियुनिट चार रुपैयाँ २० पैसामा विद्युतीय सवारी साधनका लागि विद्युत् उपलब्ध गराउने प्रक्रिया शुरु भइसकेको जानकारी दिए। रातको समयमा विद्युत्को माग असाध्यै कम हुने भएकाले सोही समयमा विद्युत्को खपत बढोस् भनेर सस्तो दरमा विद्युत् उपलब्ध गराइएको बताए।

प्राधिकरणले बढी विद्युत् माग हुने समयमा विद्युतीय सवारी साधन चार्ज गर्दा नौ रुपैयाँ ५० पैसासम्म पर्ने र दिउँसो प्रतियुनिट सात रुपैयाँ ५० पैसासम्म पर्न जाने जनाएको छ । विद्युतीय सवारी साधनको प्रवद्र्धनमा सरकार र निजी क्षेत्रको सक्रियता बढेपछि प्राधिकरणले पनि त्यसलाई उपयुक्त विधिबाट विद्युत् उपलब्ध गराउन लागेको हो ।

Facebook Comments