मकवानपुरमा डेङ्गु रोगको प्रभाव घट्दै

हेटौँडा – मकवानपुर जिल्लाको केही गाउँपालिका, थाहानगरपालिका र हेटौँडा उपमहानगरपालिका क्षेत्रमा अहिले डेङ्गु रोगको प्रभाव घट्दै गएको छ ।

मकवानपुरमा गत साउनको पहिलो हप्तादेखि यही असोजको २३ गतेसम्म एक हजार ६०० डेङ्गु रोगीको उपचार भइरहेको स्वास्थ्य कार्यालय मकवानपुरले जनाएको छ । रोगीको काठमाडौँ, ललितपुर, चितवनको भरतपुर र हेटौँडाको विभिन्न अस्पतालमा उपचार भइरहेको स्वास्थ्य कार्यालयले जनाएको छ ।

डेङ्गु करीब ३० प्रतिशत बिरामी सम्बन्धित चिकित्सको परामर्शअनुसार, घरमै बसेर उपचार गराइरहेको हेटौँडा उपनगरपालिकाका स्वास्थ्य महाशाखाका प्रमुख सुपेन्द्र कार्कीले बताए ।

सो रोगले मकवानपुरको मनहरी, भीमफेदी, बकैयाँ, बाग्मती, राक्सिराङ गाउँपालिका, थाहानगरपालिका र हेटौँडा उपमहानगरपालिकाको विभिन्न वडा प्रभावित भएको थियो ।

हेटौँडा उपमहानगरपालिका, स्वास्थ्य कार्यालय मकवानपुर र प्रदेश स्वास्थ्य निर्देशानालयको संयुक्त आयोजनामा डेङ्गु रोगबाट प्रभावित भएका टोलका घरघरमा जनचेतना परिचालन गरी अनावश्यक जमेको पानी नियन्त्रण गरी लामखुट्टेको प्युपा र लाभा नष्ट गर्ने अभियानलाई तीव्रता दिएको कारणबाट रोगको प्रभाब घटेको हेटौँडा उपमहानगरपालिका हरिबहादुर महतले जानकारी दिए ।

बिरामीलाई तत्काल रोगको पहिचान गर्न लागि हेटौँडा उपमहानगरपालिकाले निःशुल्क किट उपलब्ध गराएको हेटौँडा उपमहानगरपालिकाका कार्यकारी अधिकृत भगवान अर्यालले बताए ।रासस

Facebook Comments